ഇന്ത്യൻ സൂപ്പർ ലീഗ് ജേതാക്കളായ എ ടി കെ മോഹൻ ബഗാൻ അടുത്ത സീസൺ മുതൽ മോഹൻ ബഗാൻ സൂപ്പർ ജയന്റ്‌സ് എന്നറിയപ്പെടും.ബെംഗളൂരു എഫ് സിക്കെതിരെ സ്വന്തമാക്കിയ ആവേശകരമായ ഫൈനൽ വിജയത്തിന് ശേഷം ക്ലബ്ബ് ഉടമ സഞ്ജീവ് ഗോയങ്കയാണ് ഇക്കാര്യം വ്യക്തമാക്കിയത്.കുറച്ചു മുൻപ് തന്നെ തീരുമാനം എടുത്തിരുന്നുവെന്നും കലാശപ്പോരിന് ശേഷം പ്രഖ്യാപിക്കാൻ മാറ്റി വെച്ചതായിരുന്നുവെന്നും അദ്ദേഹം പറഞ്ഞു.

ഐ എസ് എൽ ക്ലബായിരുന്ന എ ടി കെ യുമായി ലയിച്ച് 2021ലാണ് രാജ്യത്തെ പഴക്കം ചെന്ന ഫുട്‌ബോൾ ടീമുകളിലൊന്നായ മോഹൻ ബഗാൻ ഐ എസ് എല്ലിലേക്ക് കടന്നുവരുന്നത്.എന്നാൽ പേരിലെ എ ടി കെ എന്ന ഭാഗത്തിൽ താത്പരരല്ലാതിരുന്ന ബഗാൻ ആരാധകർ പ്രതിഷേധസ്വരമുയർത്തിയിരുന്നു.ഇതേത്തുടർന്നാണ് ടീമിന്റെ പുനർ നാമകരണം.