IFFK 2022 Klondike Review : 2014 ലെ റഷ്യയുടെ യുക്രെയ്ൻ ആക്രമണത്തിനിടെയുണ്ടായ യഥാർത്ഥ സംഭവം പ്രേമേയമാക്കി റീന എർ ഗോർബച് ഒരുക്കിയ ചിത്രമാണ്  'ക്ലോണ്ടൈക്ക്'. മറെയ്ന സ്വതന്ത്ര സംവിധായികയാകുന്ന ആദ്യ ചിത്രം കൂടിയാണിത്. റഷ്യ-യുക്രെയ്ൻ യുദ്ധം ആരംഭിക്കുന്ന സമയത്ത് അതിർത്തിയിൽ താമസിച്ചിരുന്ന ഒരു കുടുംബത്തിന്റെ കഥയാണ് ചിത്രം പറയുന്നത്. ഗ്രാമം സായുധസേന പിടിച്ചടക്കിയിട്ടും വീട് വിട്ടിറങ്ങാൻ വിസമ്മതിക്കുന്ന ഇർക്കയുടെ ജീവിതമാണ് 'ക്ലോണ്ടൈക്ക്'. പൂർണ ഗർഭിണിയായ ഇർക്കയും ഭർത്താവ് ടോളിക്കും അനുഭവിക്കുന്ന പ്രതിസന്ധിയിലൂടെയാണ് ചിത്രം കടന്നുപോകുന്നത്. റഷ്യൻ ഭീകരതയും യുക്രെയ്ൻ ജനത നേരിടുന്ന അവസ്ഥയെയും ലോകത്തെ അറിയിക്കാനുള്ള മറെയ്ന എർ ഗോർബാക്കിന്റെ ശ്രമമാണ് ചിത്രം.

റഷ്യ- യുക്രെയ്ൻ അതിർത്തി സംഘർഷത്തെ അന്താരാഷ്ട്ര കാഴ്ചക്കാരിലേക്ക് എത്തിക്കാനാണ് ക്ലോണ്ടൈക്ക് എന്ന ചിത്രത്തിലൂടെ മറെയ്ന ശ്രമിക്കുന്നത്. നായികയായ ഒക്സാന ചെർക്കഷീനയുടെ അതി​ഗംഭീര പ്രകടനമാണ് ചിത്രത്തിലെ ആകർഷണം.

'ഒരു മോർട്ടാർ ആക്രമണത്തിൽ ഇർക്കയുടെ വീട് തകരുന്നതിൽ നിന്നാണ് ചിത്രത്തിന്റെ ആരംഭം. വിഘടനവാദികളോട് അനുകൂല നിലപാടുകളുള്ള ഭർത്താവ് ടോളിക്കിനും ജന്മനാടായ യുക്രൈനെ ജീവന് തുല്യം സ്നേഹിക്കുന്ന അനുജൻ യൂറിക്കിനും ഇടയിൽ ഗർഭിണിയായ ഇർക്ക അനുഭവിക്കുന്ന ആത്മ സംഘർഷം പ്രേക്ഷകന് അനുഭവിക്കാൻ സാധിക്കും. ഡോൺബാസിലെ യുദ്ധത്തിന്റെ പശ്ചാത്തലത്തിൽ ഒരു കുടുംബം അനുഭവിക്കുന്ന കഷ്ടപ്പാടുകൾ കണ്ണിനു മുൻപിൽ ക്ലോണ്ടൈക്ക് കാട്ടിത്തരുന്നു. അതിനു സാക്ഷ്യമാണ് ചിത്രത്തിന്റെ ആദ്യ പ്രദർശനത്തിന് ശേഷം ചോദ്യോത്തര വേളയ്ക്കായി ഒക്സാന തീയേറ്ററിലേക്കെത്തിയപ്പോൾ ലഭിച്ച കയ്യടി. 

യുക്രെയ്‌നിന്റെ ഈ വർഷത്തെ ഓസ്കാർ പ്രതീക്ഷ കൂടിയാണ് ഈ ചിത്രം . 2022 ലെ സൺഡാൻസ് സിനിമാ മേളയിൽ വേൾഡ്‌ സിനിമ ഡ്രാമാറ്റിക് വിഭാഗത്തിൽ മികച്ച സംവിധാനത്തിനുള്ള പുരസ്‌കാരം ഈ ചിത്രം നേടി. ബെർളിൻ ഇന്റർനാഷണൽ ഫിലിം ഫെസ്റ്റിവലിൽ പനോരമയുടെ ഓഡിയൻസ് പുരസ്കാരത്തിൽ രണ്ടാം സ്ഥാനവും, ഇസ്താൻബുൾ ഫിലിം ഫെസ്റ്റിവലിൽ മികച്ച ചിത്രത്തിനുള്ള ഗോൾഡൻ ട്യുളിപ് പുരസ്കാരവും ചിത്രം സ്വന്തമാക്കി .