ജീവിതത്തിലെ മുപ്പത് വർഷങ്ങൾ ക്ഷണനേരം കൊണ്ട് മലവെള്ളം പോലെ മനസ്സിലൂടെ കുത്തിയൊലിച്ച് പോയ ഫീൽ !

മലപ്പുറം കലക്റ്ററേറ്റിന്റെ കോൺഫ്രൻസ് ഹാളിന്റെ വരാന്തയിൽ കേശവൻ സാറിനൊപ്പം ഈ  ഫോട്ടോക്കായി പോസ് ചെയ്ത നിമിഷം....

ഞാനിപ്പോൾ മലബാർ സ്പെഷ്യൽ പോലീസിലെ എഫ്  കമ്പനി  ആർ.ടി.പി.  സി. നമ്പർ197.

"ജീവിക്കാൻ വേണ്ടി മരിക്കാനും തയ്യാറായി " 1993 ലെ പുതു വർഷപ്പുലരിയിൽ വീട്ടിൽ നിന്നും  പാണ്ടിക്കാട് ക്യാമ്പിലേക്ക് ഇറങ്ങിപ്പുറപ്പെട്ട ഞങ്ങൾ 126 പേർ.

ഇരുപത്തിനാല് മണിക്കൂറിന് ഒരു കൽപ്പാന്തത്തിന്റെ ദൈർഘ്യമുണ്ടന്ന് തോന്നിപ്പോയ ജീവിതത്തിലെ ഏറ്റവും അസഹനീയ ദിനങ്ങൾ !

ആശ്വാസ വാക്കുകൾ കൊണ്ട് എം.സി.കേശവൻ നായർ എന്ന ഞങ്ങളുടെ ഓഫീസർ കമാന്റിംഗ്  ഇതാ ഈ ചിത്രത്തിലുള്ള പോലെ തന്നെയാണ് അന്ന് ഞങ്ങളെ ചേർത്തു പിടിച്ചത്. 

മൂന്ന്പതിറ്റാണ്ട് മുമ്പ് ആദ്യമായി കേശവൻ സാറിന്റെ കാണുമ്പോൾ എനിക്കിന്നുള്ള പ്രായമാകും സാറിന് ,

പക്ഷേ ഇന്ന് മലപ്പുറത്തെ റിപ്പബ്ലിക്ദിന പരേഡിന്റെ ഒരുക്കങ്ങളുടെ മുന്നോടിയായി കലക്റ്ററേറ്റിൽ നടന്ന മീറ്റിംഗിൽ പഴയതിലേറെ ഊർജ്ജസ്വലതയോടെയാണ് കേശവൻസാർ പങ്കെടുത്തത്.

സർവീസ് ജീവിതത്തിൽ എവിടെ വച്ച് കാണുമ്പോഴും  അറിയാതെ കൈ സല്യൂട്ടിന്  വേണ്ടി ചലിക്കുന്ന കുറച്ചു പേരുണ്ട് , അതിൽ ആദ്യ പേരാണ് ശ്രീ.എം.സി.കേശവൻ നായർ എന്ന .എം എസ്.പി യിലെ ഈ പഴയ അസി.കമാന്റന്റ് ....